Tamu ya Mapenzi ilipogeuka shubiri

Shida ni kwamba mapenzi hayana mwenyewe. Masahibu tunayokumbana nayo huku mtaani katika mapenzi ndiyo hayo hayo yanayowakabili mastaa. Hakuna tofauti. Hawa hapa ni mastaa yaliyowakuta katika mapenzi.

MAPENZI matamu. Unapopata umpendae na ukaamini anakupenda kama umpendavyo unaweza kuiona dunia yote ni yako. Lakini yanapochachuka hugeuka shubiri.

Shida ni kwamba mapenzi hayana mwenyewe. Masahibu tunayokumbana nayo huku mtaani katika mapenzi ndiyo hayo hayo yanayowakabili mastaa. Hakuna tofauti. Hawa hapa ni mastaa yaliyowakuta katika mapenzi.

1. Stamina na mkewe

Wasanii wa rap ni watu wanaoaminika kuwa ni wagumu. Lakini, kuhusu mapenzi unaweza kusema hamna mkate mgumu kwenye chai. Stamina alifunga ndoa kwa furaha Mei 5, 2018 na aliyekuwa mpenzi wake, Veronica Peter, katika Kanisa Katoliki, Morogoro mjini. Lakini, ghafla hivi karibuni ukaibuka uvumi kwamba, wawili hao wameachana. Na haraka mkali huyo akaachia ngoma inayokwenda kwa jina la ‘Asiwaze’. Mashairi yanavyoanza tu utaelewa maana ya msemo ‘tamu imeingia shubiri’. Anasikika akiimba: “Unaposikia neno ndoa ujue noma, kabla sijaanza chochote kwanza naomba kusonya...”

Video ya wimbo huo inaeleza kila kitu. Anaonekana amewafunga kamba kwenye viti mwanamke na mwanamke, akiashiria mkewe na mtu aliyemuibia mke. Na katika mashairi anamtaja “Mchezaji aliyekuwa (katika klabu ya Simba) akimtuhumu kumuibia mkewe. Anahoji, mahari alitoa ya nini, michango alichangisha ya nini, cheti cha ndoa atakifanyia nini kwa sababu huwezi hata kuombea kazi na angalau akajiliwaza kwa kuirudisha pete kwa sonara akarudishiwa “nusu hasara”. Katika mahojiano Stamina alitoa tuhuma nyingi kuwa ndiyo chanzo cha kuyumba kwa ndoa yake.

2. Mabeste na Lisa

Nyota wa Bongo Fleva, aliyewahi kutamba na ngoma zake kama ‘Baadaye Sana’, ‘Dole’ na ‘Nishauri’, William Venance aka Mabeste alimuuguza kwa shida kwa takriban miaka miwili mkewe Lisa kati ya 2014-15. Ilifika wakati Mabeste aliishiwa na pesa kuomba msaada huku akilia katika mahojiano mbalimbali aliyofanya. Hakuna aliyetarajia kama wanandoa hao wenye watoto wawili, Kendrick na Katelyn, wangekuja kuachana kutokana na upendo walioonyesha wakati wa matatizo ambapo, jamii iliwachangia pesa kwa ajili ya matibabu.

Hata hivyo, kila chenye mwanzo kina mwisho. Wameachana huku Mabeste akimtuhumu mkewe kuchukuliwa na rafiki yake mwenye pesa, wakati Lisa anasema amekimbia vipigo kwa mwanaume huyo ambaye amemtuhumu kwa “kukaa tu nyumbani” bila kusaka pesa, kutobeba majukumu yake kama mwanaume na kutokuwa na wivu wa kuuliza pesa anazoleta (Lisa) kwa matumizi zinatoka wapi.

3. Dogo Janja na Irene Uwoya

Ilikuwa ngumu kuamini kama ni kweli ilikuwa ni ndoa hii kati ya nyota wa Bongo Muvi, Irene Uwoya na mkali wa Bongo fleva, Dogo Janja. Wengi walisema wawili hao hawaendani. Uwoya alimzidi Janjaro kwa kila kitu kuanzia umri, urefu, unene, umaarufu hadi ‘followers’ wa Insta (Uwoya na wafuasi milioni 4.4, Janjaro anao milioni 3.3). Lakini, hayo yote si lazima yawe kikwazo cha wao kupendana kama wangetaka kupendana kweli. Ndoa hiyo ya pili kwa Uwoya baada ya ile ya kwanza aliyofunga kifahari na mwanasoka wa Rwanda, Hamadi Ndikumana ‘Katauti’ (sasa marehemu) kuvunjika, nayo ilivunjika kimya kimya.

4. Nuh Mziwanda na Shilole

Nyota hawa wa Bongo Fleva walidumu mapenzini kwa muda mrefu. Nuh alichora tattoo kubwa mkononi akiandika jina la Shishi Baby. Lakini hiyo haikutosha kuwafanya wadumu. Waliachana, Nuh akalazimika kipitia machungu mengine ya sindano za moto za kuchorea tattoo kwenda kuibadili tattoo ya ‘Shishi Baby’ kisha akaoa mwanamke mwingine, wakaachana pia.

Wakati Shishi sasa ameolewa na fundi magari Uchebe.

5. Tunda na Castor Dickson

Mtangazaji wa luninga, Castor Dickson aliingia katika mapenzi na kimwana sosholaiti Tunda, ambaye jina lake halisi ni Anna Patrick Kimario. Jamaa alijichora hadi tattoo ya Tunda pembeni ya kiganja chake. Lakini, ni wachache sana ambao walitarajia kama wawili hao wangedumu.

Mapenzi yao yalivunjika baada ya muda mfupi na kumuacha Castor na machungu ya kuhitaji kufuta tattoo ya Tunda. Mtu mmoja kwenye Insta alimshauri njia rahisi ya kuifuta kumbukumbu ya Tunda mwilini mwake, alisema: “Badili tu ile T weka P isomeke Punda”.

6. Jackline Wolper na Harmonize

Nyota wa Bongo Muvi, Jacqueline Wolper alizama kwenye penzi la aliyekuwa supastaa wa WCB, Harmonize a.k.a Konde Boy.

Mwanamama maarufu wa mitandao, Mange Kimambi, akavujisha kuwa wawili hao wameachana na kwamba, Konde Boy katua kwa mwanadada mzungu mwenye kujiweza kipesa, Sarah Michelotti, raia wa Italia. Mange akamwaga tuhuma nzito kinoma.

Wolper alionekana kuumia zaidi na kuachana huko, akajaribu kutafuta faraja kwa kijana mwenye misuli na tattoo nyingi mwili mzima, Brown. Brown akaongeza tattoo mpya kifuani mwake akiandika ‘I Love Wolper’, lakini hawakudumu, wakaachana. Brown akaifuta tattoo kwa kuchora picha ya mtu juu yake. Wolper kisha akavishwa pete na mwanaume mwingine aliyeenda kumtambulisha hadi kijijini kwao kwamba, wanajiandaa na ndoa lakini kimya hadi leo japo ikaelezwa kuwa ilikuwa kiki tu.

7. Lulu na Kanumba

Ilikuwa ni bahati mbaya kwamba kifo kiliingilia kati. Wawili hao waliripotiwa kuwa wapenzi wakati muigizaji Steven Kanumba alipokumbana na umauti. Tamu ya mapenzi iligeuka shubiri pale Lulu alipojikuta katika mikono ya sheria akisota rumande muda mrefu hadi kukutwa na hatia ya kuua bila kukusudia na kufungwa jela.

Lulu sasa ametulia kwa don wa Efm na Tv, Majizzo.

8. Diamond na Wema Sepetu

Walivishana pete za uchumba na walidumu pamoja kwa muda mrefu. Ilikuwa ni ‘best kapo’ ya mastaa Bongo na wengi waliamini wawili hao wangefunga ndoa. Lakini mambo yaliharibika baada ya Wema kuzawadiwa gari kali aina ya Nissan Murano ambalo halijulikani lilitoka kwa nani katika sherehe yake ya kuzaliwa ukilinganisha na Toyota Mark II ambayo Mondi alijikakamua kumzawadia ‘bebi’ wake huyo.

9. Diamond na Zari

Baada ya kuhusishwa na vimwana wengi, ‘Sukari ya Warembo’ Naseeb Abdul, alitua kwa sosholaiti wa Uganda, Zari ‘The Boss Lady’ Hassan. Walihamia pamoja katika nyumba mpya ya Madale ambayo Mondi aliiita Madale State House. Kila mmoja aliamini wawili hawa wangefunga ndoa.

Hata hivyo, mambo yalienda kombo baada ya binti mmoja kujirekodi akiwa nyumbani Madale wakati Zari akiwa Afrika Kusini anakosimamia biashara zake.

Hiyo ilikuwa ni msumari wa mwisho katika jeneza la uhusiano huo. Mfululizo wa tuhuma za Mondi na Zari hakuvumilia, akalipindua jina la Madale State House, akapaita Madale Guest House. “Penzi yoyoyooo limeleta kwa wanangu vita, siku hizi siwaoni, naishia kuwa-like tu Insta,” akaimba Mondi katika wimbo wake wa ‘Inama’ akimshirikisha Fally Ipupa.

10. Ray C na Lord Eyez

‘Kiuno bila Mfupa’ Ray C alitingisha kisawa sawa anga la Bongo Fleva wakati wake. Mara paap akazama katika penzi la rapa mgumu wa kundi la Nako2Nako Soldiers kutoka Arusha, Lord Eyez. Baadaye mwanadada huyu ambaye jina lake halisi ni Rehema Chalamila aliingia katika matumizi ya dawa za kulevya. Akawa teja wa kutupwa huku akitupa lawama kwa Lord Eyez, ambaye wakati huo walishapigana chini.

Ray C sasa amepona na anajaribu kurejea upya kwenye game kama ilivyo kwa Lord Eyez, ambaye anashusha ngoma zake mdogo mdogo.